Sunday, November 04, 2007

Josto Kĩnoru wa Njacĩ.

Mũrata wakwa Mũthomi Mũgĩ, na haarĩa kabere nĩtwatiganĩrĩire Kamaanja agĩthiĩte kũracia ona akaguraria mbũri ciake. Nĩ akĩheirwo ũhiki na mũthenya wa ũhiki mũthuri ũmwe, akĩheyo kamweke ageithie andũ.

Josto Kĩnoru wa Njacĩ aarĩ gĩtang’a gĩa itũũra. Akĩrĩ mũndũ wa mwĩgatho na kwĩhuhĩra mĩrũri. Mũtingĩaririe nake na ndeting’urie na mĩario ona rĩngĩ kwĩyonania taarĩ we wiki wahotete kũgĩa na indo nyingĩ itũũra-inĩ. Nĩ eyambaga ota maburi na akenda andũ mamenye atĩ we ti ngĩa. Aakĩrĩ wakinĩwe wa ithe wa Mugeci na nĩakĩheirwo kamweke ageithie andũ matanaharagania.

Akĩrika kwaria akiuga, ‘Ee niĩ nĩniĩ njĩtagwo Josto Kĩnoru wa Njacĩ, na ndĩ mũndũ wa bata. Rũgongo rũrũ ti andũ aingĩ matanjũĩ na bũrũri-inĩ ti andũ aingĩ matateithĩkaga nĩ kĩyo gĩakwa. Mũndũ ũnyuaga kahũwa kahota gũkorwo koimĩte gĩthĩinĩ gĩakwa. Ũrĩa ũnyuaga macani nĩ ũhũthũ makorwo matuĩtwo gwakwa. Iria narĩo nĩmũkĩũĩ nĩniĩ ndũragia thothaitĩ. Ingĩtiga kũrĩithia ngũkũ ciana cia ũhĩndĩ Nyairobi na Thĩka itingĩona matumbĩ. Ningĩ atarii no matĩĩre nĩ ũndũ wa kwaga ngũkũ cia kũrĩa. Nĩ ũndũ ũcio ndĩkĩrĩ mũndũ wa bata mũno ona ĩtegũgĩtinda ngĩyaria.

‘Rĩu nĩndagĩkena nĩ kũheo kahinda gaka ndĩmũgeithie na ndĩkĩmwĩre tũmaũndũ tũnini tũkoniĩ itũũra rĩrĩ riitũ. Nĩmũkĩũĩ atĩ nĩngoragwo ngĩciria mũno ũhoro wa itũra rĩrĩ riitũ. Rĩu ũndũ ũrĩa ndĩronire ingĩteithia andũ naguo nĩ kuongerera mbathi nĩgetha andũ magakĩhota gũthiĩ wĩra na makainũka. Nĩndĩrakĩgũrire mbathi ĩgĩrĩ cia mũthemba wa icucu, na tondũ nĩiteng’raga mũno, tũrakĩongereire thogora o hanini. Rĩu ningĩ nĩmũkũmenya atĩ kwĩ hĩndĩ itararĩ gũkũ bũrũri-inĩ. Nitũrathiĩte na nyina wa Njacĩ kũũrĩa bũrũri wa Rũraya, nĩgetha akarorwo magego. Nĩ ararĩ na igego rĩramũtuuraga na rĩrarutwo na aragĩkĩrwo rĩngĩ. Na niĩ nĩndĩrakĩroragwo kĩara gĩkĩ kĩnene gĩa kũgũrũ, tondũ ndĩrakinyaga ngaigua thithi. Na kĩrakĩoneka atĩ nĩ rũara rũrakũrĩte na mwena na rũrakĩrengwo. Gũkĩrengwo rũara nĩ mũthũngũ, wĩ kwa mũthũngũ ndũkĩrĩ ũndũ mũhũthũ.

‘Rĩu ndĩkĩrĩ kũu nĩndĩragĩcemanirie na andũ aingĩ a itũũra rĩrĩ arĩa me kũu na marakĩhe ngeithi. Ciamũkĩrei nĩcianyu. Aingĩ nĩmakĩrutaga mawĩra ota marĩa mũrutaga gũkũ na makĩrĩ na kĩyo mũno. Nĩndĩronire angĩ, ona mataahotaga gwĩthamba wega me gũkũ, nĩma’kĩmenyanire na thabuni na magakĩrura wega mehaka tũmaguta twa kũu. Nĩndĩrakĩgũrire tũmaguta tũu na twĩ harĩa nduka-inĩ mũndũ no akĩgũre na erinde hunyũ ahanane na comba. Nĩndĩrahotire kũgũra cukari tani cigana ũna na wĩhakuhĩ gũkinya na meri. Nĩnjarĩtie na thirikari na ngetĩkĩrio ndehe ũmwe na gũkũ tondũ nĩmũĩ cukari wa mũrĩmo tiguo wa gũkũ. Ũcio nĩ mũtheru mũno na wĩ mũrĩo tiguo ũyũ wa na gũkũ karia-inĩ ka ihĩĩ. Nĩkĩo ndĩraugire no nginya itũũra rĩakwa rĩnyue ũcio mũtheru wa mũrĩmo. Nĩ ũkĩrĩ na goro hanini no nĩnjũĩ nĩmũkũũkenera wakinya. Nĩ mũnyaka mũnene itũũra riitũ gũkorwo na cũkari ta ũcio.


Ũndũ ũrĩa ũngĩ ndĩronire nĩ ũhoro wa kũrĩa irio njega. Nonginyagia andũ matige gũcoka kũrĩaga o ngima na matharũ nĩgetha mwĩrĩ ũgĩe na hinya. Mũndũ ndangĩhota gũtua kahuwa wega atambĩte kũrĩa. Nĩkĩo nĩtũragĩire na mũbango wa arĩa othe matuaga kahuwa na macani gwakwa makandĩkaga indo nduka-inĩ ya Nyina wa Njacĩ na magatinagio hingo ya kũrĩhwo o njumamothi. Mũndũ angĩkorwo ndarĩ na hinya wa kũgũra ngũkũ e wiki no magakĩgũranĩra na mũndũ ũngĩ na magagĩtinana o mũndũ wa nuthu wa nuthu.


Nĩtũkĩĩrutĩire gũteithia andũ o ũrĩa twahota nĩgetha nao meteithie. Rĩngĩ mwahota kuona indo ta ciĩ na goro ha nyina wa Njacĩ no nĩ tondũ nyingĩ ciumĩte mũrĩmo. Rĩu mũgĩtĩkĩre tũkũrie itũũra riitũ na rĩrĩa kwagĩa ũndũ ta ũyũ tugakĩnyitanĩra. Itanagĩikara thĩ nĩngwenda kũnengereria mwanake ũyũ mũhikania na mũhiki wake kamũthĩgi ga gwĩtirimia nako makĩrĩ rũgendoinĩ rwa gwaka mũciĩ wao. Nĩharĩ na ng’ombe ĩrĩa ĩtanatinda ĩkĩrehwo haha tondũ ĩkĩrĩ rũru na mũkĩiyĩre narua ĩtanaringĩrĩra mũno tondũ ĩngĩciarĩra gwakwa njaũ nĩ yakwa. Kuoguo mũhĩke magũrũ mũiyĩre. Ĩno nayo nĩ mbahaca na ĩna mũgĩko wa gwaka kiugũ. Nake nyina wa Njacĩ nĩ akĩmũkaribithia na metha ĩno na itĩ ciayo nĩgetha mũtigakĩigagĩrĩre thani maru-inĩ mũkĩrĩa. Rĩu ti rĩrĩa twaihũragĩrwo cihũri itarĩ njikarĩro itangĩerũgamirie metha igũrũ. Rĩu no mũhaka mũndũ agakĩrĩaga na thitarehe ta mũndũ wa bata ta niĩ. Kiamũkĩrei ici thima ndikũmenya mũgũciga kũ no ũcio nĩ ũhoro tũngĩgĩthondeka thuthainĩ. Nĩndacokia athanda kũrĩ ithe wa Mũgeci na mũtabania nĩkũnjĩtĩkĩria ngeithie andũ. Nĩ ngatho. Athanda.’

Thoma Thimo 25:14

2 Comments:

At Sat Nov 29, 01:44:00 PM EST, Blogger Unknown said...

Gûtirî ûndû ûngenagia gûkîra gûthoma ng'ano ciaku. Niî na andû angî aingî nîtûendete gûcerera mûhûngîri ûyû waku. Thengiû mûno

 
At Thu Jun 04, 09:22:00 AM EDT, Blogger Gaks said...

Ningwenda ona nii gucokia ngatho nyingi kuri we ng'ang'a niundu wa kwandika turugano tuthaka muno ona ningi niundu wa ruthiomi rwaku rutari handu rwogomete. Ikinya ni riu tukurie ruthiomi. Thengiu o ringi

 

Post a Comment

<< Home