Friday, July 06, 2007

Wa kamũiria twarĩtie cia Mũkũrĩma tamba ũigue ndeto ĩno.

NĨNDECIRIA ŨNDŨ ŨNGĨ

Bũrũri ti mũbira ũcũganĩrio, na ti mwana ũthuthĩrwo
Mũrĩmi tiwe mũrĩi na mũteti tiwe mũtongoria
Kũrĩ ateti mangĩĩtetia o ene makiugaga no atongoria
Ta wĩhũgũre wone nĩ aigana makumĩte thutha
Kana no gũthiĩ ũkĩhuhaga mĩrũri na rũru nĩrũhurunjũkire.

Burugĩi wa Ikamba kinya baraganya wa Cumarĩ
Maĩ ma cumbĩ kĩambĩrĩria kĩa reri
Kinya mũico wa reri karia-inĩ ka ihĩĩ
Bũrũri no gũcũgio ũracũgio, atĩ twetherwo mũrĩithi
Kaĩ kwĩ ĩĩ mũthece yoyagĩra ĩrĩa ĩngĩ

Hiti na njũi, ngarĩ na kĩrumi, nderi ona rwĩgĩ
Atĩ icire wa mbũri na ng’ondu, hau ciona kĩhooto?
Ĩrĩ mũrungu yatuthwo nĩ ĩrĩ hĩa ĩtũrĩkagio riitho
Mwano ũrĩ gũthukwo, mbũgũ ciagerwo
Na ciauga atĩrĩ ndũteyagwo ũtarĩ mwatie

Twagĩte ona tũtarigĩte, githĩ mũgũnda mũkũrũ ndũrĩ ũmatho
Kaĩ hianyũ ũtatemagwo na themithũ
Tũtihinyie ngamba, tũtaahe na tũithĩrie ciandainĩ
Twaikũrũkirie ciondo ihũtiĩ nĩtwambatie ciondo ihũniĩ
Twakiuma kĩruruinĩ kĩa mũtamaiyu tũthiĩ kĩruruinĩ kĩa mũbage?

Mũrĩa ng’ũũrũ na ita rĩake marong’atĩka
Maromoca na mabuĩrie na mbĩrĩrĩka icio ciao
Mũhũhũtĩko na kĩhereko kĩao kĩmacokerere ta kayũ
Narĩo ita rĩa ciĩko na ũhoreri rĩĩgangare
Mũtũri mũno ndagaga mũgĩ nĩ mũtaare.

Tuĩka mũtĩ mũrũmu, ona wahurutwo nĩ rũhuho
Ũinamagia thũmbĩ ũgacoka ũkehanda mĩri ĩrĩ o mĩrũmu
Njũkĩ ĩrĩ ĩrũa, mĩatũ nĩmĩanĩke, ũũkĩ nĩtũgũthũya
Hengero nĩciĩkĩrwo rũhindigo ũũkĩ ũtanaitĩka
Warathwo menya mũnyaka wĩ mbere ya kahinga.

4 Comments:

At Mon Jul 09, 06:48:00 AM EDT, Anonymous Anonymous said...

Aaaai! Charuthi kiu gitiakirituha muno! Kwaria ma ndinanyita kindu.

 
At Wed Nov 14, 01:34:00 AM EST, Anonymous Anonymous said...

Kai wikumenyithia maundu maingi mega urorima gukumia .
Thaii.

 
At Sat Nov 29, 01:56:00 PM EST, Blogger Unknown said...

Carûthi, aaaaui, we wî njamba ya Gikûyû. Gûtirî ûngîtongoria ngerewani cia rûthiomi tawe. Ngai akûrathime. Ngai njega

 
At Sat Nov 29, 01:57:00 PM EST, Blogger Unknown said...

Carûthi, aaaaui, we wî njamba ya Gikûyû. Gûtirî ûngîtongoria ngerewani cia rûthiomi tawe. Ngai akûrathime. Ngai njega

 

Post a Comment

<< Home