Monday, March 05, 2007

MAWONI MAKU WEE MŨTHOMI MŨGĨ

Mũrata wakwa Mũthomi Mũgĩ,

Rĩu tĩtiĩrĩgĩte gũcemania, na tũtikĩũranĩtwo na ũũru no mĩhang’o. We nĩũgũkĩmenya atĩ mbathi ĩno ya mĩhango ĩkũhũra rethi andũ mathiaga matengerete matigatigwo. Noguo onaniĩ ngĩtariĩ. Ĩndĩ ndingĩriganĩrwo nĩ kĩrĩko giitũ nawe atĩ nĩtũrĩgomanaga haha kĩharo-inĩ gĩkĩ na tũkarĩanga nyama ya rũrĩmĩ twĩ hamwe. Nĩkĩo nĩndĩragĩcokia maitho na haha nĩgetha twaranĩrie hamwe.

Nĩtwĩrĩga kwaria ndeto ya mũndũ ũgũĩtwo Kamaanja, na Kũmata, ona Cari na no tũgũthiĩ na mbere. No wa mũiria ndigi itandukĩtwo nĩgetha ciogothwo kiondo gĩthiĩ na mbere gũtumwo-ri, no nyende ũnjokerie ũhoro ũnjĩĩre mawoni waku igũrũ rĩa ndeto ĩno ya wandĩki na rũthiomi rwitũ rwa gĩgĩkũyũ. Wee, ta mũthomi wa rũrenda rũrũ-rĩ, wonaga atĩa ũhoro-inĩ wa wandĩki na thiomi ciitũ cia kiumĩrĩra handũ ha kwandĩka na gĩthũngũ kana gĩthweri? Nĩ harĩ bata kwandĩka na rũthiomi rũtathomagwo nĩ andũ aingĩ, ona angĩ aaria a ruo makarũnyarara? Ta njĩra mawoni maku.

Ngai njega.

3 Comments:

At Wed Mar 07, 05:09:00 PM EST, Anonymous Anonymous said...

Muthuri ugitwo Charuthi,

Ndugecirie gutiga kwandika na ruthiomi rwitu rwa Ugikuyu. Tanii ninyendete muno guthoma maandiko maku wambere ni tondu niungenagia muno, na wakeri ni tondu maandiko maku nita mataaro -- ni gukoruo waandikaga kuringana na mitugo ya ugikuyu ta riria wiriga kuandika uhoro wa ruracio.

Burogu ino yaku ni ya bata muno na ndwagiriiruo ni gutiga kwandika na ruthiomi rwitu ati wanjiririe kwandika na githungu kana na githweri. Kuri aingi muno maandikaga na ruga icio no ni andu anyinyi muno maandikaga na gikuyu.

Kwoguo onaakoruo tutitigaga mawoni hindi ciothe wandika ri, ni tukenaga muno ni wira uria urutaga. Ona mwanake uria witagwo >d® eriga gututhekia muno aandikite na gikuyu.

Reke ndigire ohau -- ninyandikire muno onanii.

Haya, Thaai thathaiya Ngai thaaai (tariu niwona ndauga uguo nindaririkana cucu witu tondu niwe warikagia mahoya uguo -- ndaugaga Ameni).

 
At Fri Mar 09, 10:44:00 PM EST, Blogger Charuthi Ng'ang'a Wairia said...

Ni ngatho ni mawoni maku. Niwanyumiriria na ninguthii na mbere na kwandika o uria ndahota. Thii na mbere na guthoma.

 
At Mon May 14, 10:23:00 AM EDT, Anonymous Anonymous said...

nanii ninguuga ta muiritu uyu wi mbere yakwa ati nindakenio ni ruthiomi ruru, na ndingienda gutuike ati niugutiga kwandika na gikuyu.

Niigii ningwenda kuuga ati kuandika na gikuyu noo kurituhire mundu utagithoomete thukuru kana handu hangi.. no ngoona ati he ciugo,muno iria ii ndemwa igiri ta kiugo ta ngaatho, thooma na ciugo ta icio iria kaingi iruugagirirwo ni andu aingi makiandika.. noo ti aingi mamenyaga ati kuruugirira nii gucenjagia mugwetere na ona "meaning' ya kiugo ta kiu.
No nimdaakena muno ni kuona uu...
Ndugakue ngoro..
DK

 

Post a Comment

<< Home