KAMAANJA KŨGURARIA MBŨRI CIAKE 2

Mũrata Wakwa mũthomi Mũgĩ, twatigĩrĩire o ũndũ mbũri cia Kamaanja cia ngurario ciekĩrwo riiko, nĩgetha igongona rĩa kũguraria rĩthiĩ na mbere. Ta thoma ũigue ũrĩa gwathire na mbere…

Mbũri ya ithe wa Kamaanja yekĩrirwo riiko mwanya. Nyama cia gũtherũkio nacio igĩĩkĩrwo rũrigi rwa mũgio rũgacucura na nja nĩgetha rũgũcagio nyama ikĩrutwo nyũngũ thĩiniĩ. Rũrigi rũngĩtuĩka, no ũcaririe njobe nĩgetha ũthece nyama nacio na wahota kũhĩa nĩ mwaki. Ciatarwo igĩũka icunjĩ mũgwanja na itingĩrugwo irĩ mũganja mũru. Nĩkĩo rũcuthi rũkĩrengwo maita merĩ na ikĩrugwo nyũngũ ĩmwe irĩ inyanya, nyũngũ ya kerĩ otaguo.

Nyama ciarĩkia kũhĩa, andũ magĩkorwo nĩmagomanĩte na makanyitwo rũra. Andũ a ndundu ya ithe wa Kamaanja nĩmaikarĩte thĩ nyũmba na makaranĩria na ithe wa Mũgeci matongoretio nĩ Gĩkunda. Indo iria marehete mũthenya ũcio irĩ cia gũtarĩrwo mĩrongo-inĩ kana irĩ cia kũhingithia iria metĩitio ikĩneanwo. Magĩcoka makiuma nja nĩgetha igongona rĩa gũtinia kĩande rĩthiĩ na mbere. Kamaanja nĩeharĩrĩirie wega na nĩahĩahĩaga nĩkwenda kũrĩkania na ndeto ĩyo ya kũgũrarĩria Mũgeci.

Magĩikara thĩ, mũtabania akiuga no hingo Kamaanja ekuonania mũirĩtu ũrĩa aathugĩte mũciĩ ũcio. Hagĩũka atumia ana a riika na cũwe wa Mũgeci mena mĩtirima, akĩũrio kana wake e hau, Kamaanja akiuga aca. Hagĩũka ciana kenda cia mĩaka ĩtano kinya ikũmi, akĩũrio kana wake e hau, akiuga aca ndarĩ ho. Hagĩũka airĩtu kenda, othe mehotorete marĩthũ mahanaine na megekunĩkanĩria ũthiũ na marĩthũ o mahanaine makĩrũgama mbere ya Kamaanja akĩũrio kana wake e hau. Kamaanja akĩmenya nĩ mũigĩre mũtego. Na tondũ wa mwene nĩ ũmwe gĩkĩ kĩngĩ nĩ kĩrĩndĩ, nĩamenyete wega kĩratũ kĩrĩa Mũgeci ekĩrĩte na akeĩĩra atĩ arora iratũ nĩ ekũmũmenya ona ekunĩkanĩirie ũguo. No athiĩ kũbaranga akĩona atatũ mekĩrĩte kĩratũ ota kĩu akĩgwatwo nĩ thĩna. Wendo wĩ kĩriga tondũ Kamaanja ndahĩtirie na ũrĩa ahumbũririe ria mbere aarĩ Mugeci. Kamaanja akiuga wake wa ngoro wa gwĩthugĩra nĩ ũcio. Andũ arĩa marĩ hau mona ũguo makĩhũra hĩ nayo nyakĩnyua ĩkiuga ngemi.

Kamaanja aigĩirwo metha kĩharo gatagatĩ. Nyama ciarehetwo na gĩtarũrũ na kiuga gĩkaigwo mwena-inĩ. Akĩnengerwo kahiũ ka raũ, akĩoya guoko agĩtinia kiande agĩkĩra kiuga-inĩ. Akĩrenga gĩtũngo kĩa mara na kia inĩ na mũromo wa ihu agĩĩkĩra kiuga-inĩ. Agĩcoka agĩtinia gacunjĩ ka nyama ya guoko akĩrũmia Mugeci ta ũrĩa comba ũrũmagia mũhiki keki. Nyakĩnyua ĩkiuga ithano cia kahĩĩ. Nyama icio ciekĩrirwo kiuga-inĩ ikĩneo Mugeci akaihũrĩre airĩtu a riika rĩake arĩa erekeire kugĩra ũhoro atuĩke mũtumia. Nacio iria ingĩ ciarugĩtwo ona cia hĩhio igĩtinangĩrio andũ arĩa othe mokĩte, o mũndũ wa gacunji, tondũ mambura nĩ njũno. Kamaanja akĩmenya atĩ rĩu we nĩ agũranĩte, tondũ ũgũtinia kiande ũcio nĩ ũhiki mũrũmu kũringana na mũtugo witũ. Gĩtũmi nĩ tondũ gũtirĩ ũtinagĩrio kiande ataracĩirio, na mũndũ aguraragia mbũri iria aracĩtie. Ũngĩgĩtinia kiande ũtaracĩtie-rĩ, ũrakĩguraria kĩ? Icio no ta nyama cia mbucĩrĩ na ti cia igongona. Cia Kamaanja ciarĩ nyamũkĩre na nĩkĩo andũ makeneire igongona rĩu na makĩrathima.

Irio iria ciarugĩtwo mũciĩ ũcio ciarĩ nyingĩ ..

Thoma rũciũ rũngĩ .