ACIARI TIGAI GŨTE RŨRU

Ta kĩnjĩrrei atĩrĩrĩ andũ aitũ na inyuĩ ataũri a mohoro mũtaũre
Tondũ kuma rũgũrũ kinyagia itherero no mbu-rĩ
Nũ ũgwĩtĩka ũngĩ, nũ ũgũteithũra ũngĩ?
Ta rora wone ciana irĩ kuoya icinga
Ciamundia macukuru ta kĩara kĩa mahuti
Kaĩ arĩ rũruka rwa nduĩra rũrũ mbũra matũ ici
Kaĩ iganjo rĩmĩyagwo, kaĩ kumagwo gũtacokagwo!
Njũgũma njega yumaga o ikũrĩro
Ĩno mwaikĩria mwarimũ aicũhie ĩtarĩ nyitĩro-rĩ
Mwacoka mwehuta mũinagĩre ihũgo ta mũka ũrĩ kĩronda-rĩ
Nĩ amĩrorie nakũ kaĩ koiga gatune atarĩ mwamũkanĩro.
Mũciari rũnga mwana arĩ o mũnyinyi, muonererie njĩra
Na ndakaoima yo ona akũra
Tiga gũcaĩra mwana waku ũkĩmũrũnga
Wahota gũgacaya wĩ mũcerere ũkiugaga korwo nĩndoĩ
Aciari tigai kũiga rũthanju thĩ
Ngingo ndĩrĩ yakĩra mũtwe atĩ nĩguo mwana agwathe
Watho wa mũciari nĩguo wa muico harĩ mwana
Mwarekereria rũtũrĩko na rũng’athio
Mũkiugaga atĩ nĩ maendereo mũgũcinanĩrio na manyũmba macio.
Rekei tũhĩte itanoima tũcokie rigĩ itanoimagara
Tũrĩe ndundu tũcokanĩrie tũmenye harĩa runĩire
Aciari ndamũthaitha, tigai gũte rũru
Oyai wĩra wanyu mũrũnge mũtĩ ũrĩ o mũigũ
Rĩu wĩ mũnyinyi-ri nĩ ũtiirwo na wohwo na ndigi
Ũmũthĩ maracina macukuru rũciu magacina gwaku
Ũkooria ũ na nĩwaregire kũnjigwa
Ndakwĩra atĩrĩ mũrata wakwa
Njigua ĩrĩ matũ na ndindĩkwo ĩrĩ magũrũ
Wĩthare gũtanatuka ũtanamũrĩkĩrwo na ithanjĩ rĩa gwaku
Ya matharara ĩgwatagia ya nyeki na mũcarĩ ũrutagwo ndũgũinĩ
Nĩ ũũĩ mwana wakũ, maceeraga naũ hihi?
Mũcera na mũkũndũ akũndũkaga take
Arĩria mwana waku, mũgĩ nĩ mũtaare.
Ĩra mũrũguo arũmie kĩrĩra ataũke atigane na ũmaramari
Ũmithio na nyongeri irigagia na arĩa marĩ tha.