Mũrata wakwa mũthomi mũgĩ,
Hihi no ũririkane rũgano rũrũ rwa hiti.
Tene tene mũno no ti tene nĩ hĩndĩ ĩrĩa bunda ciarĩ na hĩa nĩ kwarĩ na hiti inya cia mũthemba ũrĩa wĩtagwo kiuga mbu. Igĩcangacanga nĩũndũ wa ũrĩa ciahũtĩte niciakorire handũ hathĩnjĩirwo mbũri na hagatigwo mathagiro mana.
Irĩa yarĩ mbere ĩkĩmaguthũkĩra ĩkiuga, ‘Niĩ nĩniĩ ndona na nĩniĩ ngũgaya’. Hiti icio ingĩ igĩkiuga no wega kĩgae. Hiti ĩyo yoneete ĩkĩrika kũgaya.
Ikĩoya ithagiro rĩmwe ĩkiuga, ‘Rĩrĩ nĩ rĩakwa rĩa kuona.’ Ikĩrĩa rĩu.
Ikĩoya rĩa keerĩ ĩkiuga, ‘Rĩrĩ nĩ rĩakwa rĩa kũheo.’ Ikĩrĩa rĩu.
Ikĩoya rĩa gatatũ ĩkiuga, ‘Rĩrĩ nĩ rĩakwa rĩa mũgai.’ Ikĩrĩa ona rĩo.
Ikĩoya rĩa mũico ĩkiuga, ‘Rĩrĩ nĩ riitũ tũtharane, na nĩndathara.’ Ikĩhuria na ĩkĩrĩa.
Hiti icio ingĩ cioimanirie na gũcũna thakame ĩrĩa yaitĩkĩte kũu nyeki inĩ nayo hiti kiuga mbu ĩgĩkorwo ĩhũũnĩte mũno.
Rũgano rwakwa rwathirĩra hau.
posted by Charuthi Ng'ang'a Wairia @ 3:28 AM
2 comments
2 Comments:
Wimwega mwendi ruthiomi rwa Gikuyu?
Karugano kau ka hiti inya ni kega muno. Ndiroiga oo 'itha' hindi ciothe ndathomathoma.
Nii njitagwo Kariuki na njikaraga Connecticut. Ruthiomi ruru ruitu nonginya turutugirie na niwega muno niundu wa wira ucio uraruta.
Gia na mahinda mega.
Na todo ni hingo yakwa ya mbere guthoma blogu yaku ri , njitikiria nguhe ngumo cia wira mwega uri ukoretwo naguo ee uyu wa gukuria ruthiomi rwitu. Ngumo nyingi muo ni wira mwega. ninicerega maingi. Niwega muno
Post a Comment
<< Home